Goierriko Hitza

Urtean zehar Gabiriako eliza nagusiko organoan egiten diren saioek igande honetan, azaroak 25, izango dute jarraipena. Gipuzkoako Organozale Elkarteak antolatuta, Giampaolo di Rosa organista, ikertzaile eta konposatzaile italiarraren musika entzun ahalko da organo zaharrean, 1804an eraikia eta orain dela gutxi zaharberritua.

200 urtetik gora dituen organoaren soinuarekin jendeak goza dezan, azken urte hauetako ohiturari jarraituz, Gipuzkoako Organozale Elkarteak Foru Aldundiaren eta Elizbarrutiko laguntzarekin antolatutako kontzertua da igandekoa. "Aurtengo emailea Italiatik datorkigu, nahiz eta bere musika lanak oso zabalduak izan Italian, Alemanian eta Portugalen. Giampaolo Di Rosa izena du eta pianojole eta organojole izateaz gain konposatzaile , ikertzaile eta irakaslea da", adierazi du Gabiriako Eliza Batzordeko kide Ane Miren Aizpuruk.
Egitarauaren aurkezpena eta komentarioak Esteban Elizondo organojole gipuzkoarraren eskutik izango dira.
Saioa, igandean, 12:00etako mezaren jarraian izango da.