Goierriko Hitza

Gaur eguerdiko hamabietan kamioi batek istripua izan du Gi-632 errepidean (Zumarraga-Beasain autobidea), eta gidaria, 49 urteko gizonezkoa, hil egin da. Gabiriako udal barrutian izan da ezbeharra. Zumarragatik Beasainerantz zihoan kamioia; irauli eta zeharkatuta geratu da trailerra. Bi norazkoetako trafikoa etenda dago. Gi-2632 errepidetik, lehenagoko Ormaiztegi-Zumarraga bidetik, ari da Ertzaintza zirkulazioa desbideratzen.

Scania markako kamioiak Santa Lutzi parean izan du istripua, Gabiriako Sous baserriaren parean, Ezkio-Itsasoko Santa Lutzia-Anduaga auzoaren ondoan, bi herrien arteko mugan. Kontrola galdu du, oraindik argitu ez dien arrazoiengatik, eta errepidean zabaletara geratu da, eskuineko alboaren gainean, iraulita. Kolpearen ondorioz 49 urteko gidaria bertan hil da, eta Donostiako Institutu Anatomiko Forentsera eraman dute gorpua.
Burdinezko ziriak zeramatzan kamioiak, eta zama galdu egin du itzuli denean.
Une honetan (16:34) itxita dago erabat Gi-632 autobidea, bai Zumarragarako bidean, bai Ormaiztegirakoan. Zumarragarantz doazen ibilgailuak Irizar pareko errotondara aterarazten ditu Ertzaintzak, handik errepide zaharretik gora jarraitzeko; Zumarragan, berriz, Eitzako gainean portu zaharretik desbideratzen dituzte.
Oso antzeko bigarren istripua da Gi-632 errepidean bi egunetan. Atzo Zumarragan, autobidea hartzeko zeharbide batean irauli zen beste kamioi bat, eta Ormaiztegi alderako zirkulazioa eten zuen.